遲來的七一紀事
星期一, 7月 27, 2009
七一
人話多唔多，話少都唔少。
但肯定的是，警察安排差到九彩。
和往年不同的是，今年在之前有幾個遊行。結果，要推遲開始。
而警方不像上幾年，全線封路令隊伍早行早散。
反而用間歇封路，一會放人行，又一會放車行。
實驗結果非常明顯，車又行唔到，人又行唔到。大家互頂，以IT術語就是-DEADLOCK。
烈日下狂暴曬，每行十步要停十幾分。基本上大家都開始懷疑到底來參加遊行，定係參加"遊企"。最後，塞死在電車路，人潮開始鼓譟。大家不停起閧，喊"開路"。但唔知d指揮官係太熱"HANG左機"，還是抗議未加薪所以決定乜都唔做按章工作。結果嘈就繼續嘈，人龍繼續不動。最忙的就係街邊賣水檔的哥哥仔(可能睇唔過眼，仲自動由一支5元減價到10元3支礦泉水)，仲有就係救中暑的救傷隊員。
情緒越來越熱，人越來越燥。大堆人擠在路上乾曬，旁邊的電車路明明空著但拒絕開放(事後警方說那"預留通道"是緊急時用，即是留待有人瓜老襯時黑箱車可以入到?)。中暑的人越來越多，隊中的小孩和老人家已經好辛苦。口號開始針對警務署長和前線指揮官。糾察站在中間好難做，又要維持秩序，又要和警方交涉。一個攪得不好就變成兩面不是人。
對峙的人團越來越多，後方的警員不停跑上來增援。中間沒事做的人只好當自己在看東亞運動會，揶揄那些疲於奔命比上司點佢地來回跑來跑去的差人大叫"快d"/"加油"。甚至有人當在看跑馬-"二號二號二號~"
"上啊上啊~~"
壓力到了臨界點，自然會發生衝突。前線開始有人意圖突破警方防線，由一兩個人衝到成群湧前。幾百人的壓力一下就把警方人鍊推開一個大缺口。之後警方讓開，人潮推進後空間大了，又暫時舒緩了一下壓力。在突破時，民主黨的工作人員大喊"民主黨不衝警察"...不用急著劃清界線吧，反正要被抓的話，單憑你那一兩句話也脫不了關係
:x 想看真相的話找有線新聞吧，當時他們有攝影機在場，整個"衝突"過程其實一分鐘也不夠。不過本地傳媒一致地報遊行人仕"突破防線, 衝出馬路，非常危險"云云。我想話...
一開始全世界都在馬路上，何來衝"出"。至於"闖入一條冇電車的電車路"有幾危險，真係要請教一下d記者大哥了。
然後，前隊不知在等什麼，又繼續呆站。隊尾開始出現女警組成的人鍊。一名警員用"大聲公"叫"請大家向前行不要停留"。但由於前隊根本沒動，此舉其實只係將鬆散的人潮再擠緊壓實。沒有人想變成沙丁魚，自然就沒有人聽佢支笛 XD 終於有個白衣女指揮看不過眼，搶過擴音器叫遊行人仕"好快d行，唔好塞響度"...佢唔記得，面對一班唔係小學生，係一班暴民="暴"曬左三個鐘肝火好盛的市"民"。斯文點的就寸話"你又唔開路邊有路行"，市井d的就直接問候令壽堂了。
有主動反抗同警察理論, 有被動反抗的就原地"慢步"。最後來了個好聲氣唔該前唔該後的警官，再加上糾察勸解，再重要係條隊真係開始郁，d人先又開始行。
但行唔夠幾步，又停...在伊榮街和渣甸街又折磨左好耐。又熱又迫又多人，仲有花輪大法在你耳邊打鑼打鼓。最後閃開大隊去買左杯十元正但超細杯+糖多過乜的五花茶。然後, 又開始行了。今次終於再沒有什麼阻滯。和路邊的工作人具吹水，話前隊本來仲比警察block左好耐，傾來傾去都係諸多阻撓。最後主辦單位威脅話，若唔開好條路，就全隊幾萬人掉頭番維園，咁先正正常常比條路你行...
照計我話..下次有乜冬瓜豆腐，一二三全部人坐低。反正d差佬只係唔想你行得舒服，但佢最怕就係你唔行，又或者行得好鬼慢。反正大家都在燒時間，唔鬥大力就只好鬥長命了 :x
之後，同之前幾年一模一樣，一路行一路有不同團體在宣傳。不同的議題和訴求也是維持的特色，由菜園村到劉曉波，綠霸到草泥馬。有口號，比較特別係有合唱團。最多人叫的口號當然係pk，想當年董伯都只係比人叫"下台"，曾生比人叫pk，高下立見。
值得留意係，第一二年後冒出來的大量小型議政團體今次好像大多數都消失了。創業難守業更難，熱情過了自然就會散。
第二是各個政黨的表現。社民連最鮮明，控制氣氛和參與者互動都最出色。唯一是黃毓民的籌款車在路中間，做成一個小小的樽頸位。
民主黨一向是七一的骨幹，也努力統合和宣傳意見，希望把"普選"變成主流的聲音。但主持人沒有能把握民意，支持民主不等於支持民主黨，支持普選也不等於支持民主黨。而七一出來的人，有太多不同的訴求，也不能單單以"普選"就可以概括。例如其中一幕，菜園村村民在喊口號時，有民主黨同仁突然插入帶隊改喊"爭取普選"，情形就十分古怪。七一後的立法會大敗，正正就是民主黨沒有能好好評估和把握民心。而政治上的保守和立場不鮮明，也是近年中產票流去公民黨，左翼一點的就轉到社民連，工人去了街工和職工盟，對此，民主黨到底有什麼打算?
公民黨，一早就在銅鑼灣叫賣tshirt和扇。大量的義工=大量的小販。不停叫賣"Tshirt特價64元一件"。到最後我還是搞不懂他們是來遊行還是做生意....
民協，比早幾年聲勢還要弱了。倒是街站上帶頭的年輕人，沒留心叫什麼名，說話清楚明快。
行到高院，天已經黑齊。行到總部，七時半了。他喵的個多兩個小時路程走(+站)了四個多小時，累得要命。
事後還有人在總部結集不散去，加油保重了。
發佈者：寶
於
12:34 上午
2
留言:
發佈留言
文章
成篇野唯一留意到就 "有乜冬瓜豆腐" XDDDD
又唔係咒你, 唔好咁敏感 XD